പാൻ കാർഡ് ഇല്ലാതെ എത്ര സ്വർണം വാങ്ങാം? സ്വർണവുമായി ബന്ധപ്പെട്ട് നിങ്ങൾ അറിയേണ്ട നിയമങ്ങൾ

ലോകത്ത് ചൈന കഴിഞ്ഞാൽ മികച്ച സ്വർണവിപണിയാണ് ഇന്ത്യ. നിക്ഷേപമായും, ആഭരണമായും ഇന്ത്യാക്കാർ സ്വർണം വാങ്ങിക്കൂട്ടുന്നു. എന്നാൽ രാജ്യത്ത് സ്വർണവുമായി ബന്ധപ്പെട്ട് വ്യക്തമായ നിയമങ്ങളുണ്ട്. ഈ നിയമങ്ങൾ പാലിച്ചില്ലെങ്കിൽ ആദായ നികുതി പിഴ അടയ്ക്കേണ്ടി വരും.

നിശ്ചിത മൂല്യത്തിനു മുകളിലുള്ള സ്വർണം വാങ്ങുന്നതിന് ഇന്ത്യയിൽ പാൻ കാർഡോ, അതിനു തുല്യമായ കെവൈസി രേഖകളോ ആവശ്യമാണ്. നിലവിൽ 2 ലക്ഷം രൂപയിൽ കൂടുതൽ തുകയ്ക്ക് സ്വർണ്ണം വാങ്ങാൻ പാൻ കാർഡ് നിർബന്ധമാണ്. ആദായ നികുതി നിയമം സെക്ഷൻ 114ബി സ്വർണം വാങ്ങലുകളിൽ പാൻ കാർഡിന്റെ ആവശ്യകത ഉറപ്പുവരുത്തുന്നു.

ഇതേ നിയമം 2 ലക്ഷം രൂപവരെയുള്ള സ്വർണം വാങ്ങലുകൾ കറൻസിയിൽ അനുവദിക്കുന്നു. അതിനു മുകളിലുള്ള വാങ്ങലുകൾക്ക് കാർഡോ, ചെക്കോ നിർദേശിക്കുന്നു. 2 ലക്ഷം രൂപയിൽ കൂടുതൽ മൂല്യം വരുന്ന സ്വർണം വാങ്ങലുകളിൽ കറൻസി ഇടപാടുകൾ തടയുന്നത് അദായനികുതി നിയമം സെക്ഷൻ 269 എസ്ടി ആണ്. ഇവിടെ പ്രതിദിന പരിധിയാണ് 2 ലക്ഷം രൂപയെന്നു പ്രത്യേകം ഓർക്കുക.

ഒരു ദിവസം 2 ലക്ഷം രൂപയിൽ കൂടുതൽ മൂല്യം വരുന്ന സ്വർണം വാങ്ങലുകൾക്ക് കറൻസിയിൽ ഇടപാട് പൂർത്തീകരിക്കുന്നത് പിഴ ശിക്ഷയ്ക്കും വഴിവയ്ക്കാം. ആദായനികുതി നിയമം സെക്ഷൻ 271 ഡി ആണ് ഇതു സംബന്ധിച്ചു പിഴ വിവരിക്കുന്നത്. 2002 ലെ കള്ളപ്പണം വെളുപ്പിക്കൽ തടയൽ നിയമത്തിനു കീഴിൽ സർക്കാർ സ്വർണത്തെ കൊണ്ടുവന്നിട്ടുണ്ട്. അതിനാൽ തന്നെ രാജ്യത്തെ ഓരോ സ്വർണ ഇടപാടുകളും അധികൃതർക്കു റിപ്പോർട്ട് ചെയ്യപ്പെടുന്നുണ്ട്.

സ്വർണം വാങ്ങുന്നതു പോലെ തന്നെ പ്രധാനമാണ് അത് സൂക്ഷിക്കുന്നതും. കൈയ്യിൽ കരുതുന്ന സ്വർണത്തിന്റെ അളവ് ശ്രദ്ധിക്കണം. ഇതിൽ കൂടുതലായാൽ അത് ഭീമമായ പിഴയ്ക്കു വഴിവയ്ക്കാം. കേന്ദ്ര പ്രത്യക്ഷ നികുതി ബോഡ് പറയുന്നത് അനുസരിച്ച്, കാർഷിക വരുമാനം, നിയമപരമായി പാരമ്പര്യമായി ലഭിച്ച പണം, ന്യായമായ ഗാർഹിക സമ്പാദ്യവും പോലുള്ള വെളിപ്പെടുത്തിയ വരുമാന സ്രോതസുകൾ വഴി വാങ്ങിയ സ്വർണത്തിന് നികുതി ചുമത്തില്ല.

രാജ്യത്തെ നിയമങ്ങൾ പ്രകാരം, അവിവാഹിതയായ ഒരു സ്ത്രീക്ക് 250 ഗ്രാം സ്വർണം കൈയ്യിൽ കരുതുന്നതിൽ പ്രശ്‌നമില്ല. അവിവാഹിതനായ പുരുഷന് 100 ഗ്രാം സ്വർണം കരുതാം. വിവാഹിതയായ സ്ത്രീക്ക് 500 ഗ്രാം സ്വർണവും, വിവാഹിതനായ പുരുഷന് 100 ഗ്രാം സ്വർണവും നിയമപ്രകാരം വീട്ടിൽ സൂക്ഷിക്കാം. പരിധിയിൽ കൂടുതൽ സ്വർണം പിടിക്കപ്പെട്ടാൽ കടുത്ത പിഴ ഈടാക്കും.

സ്വർണം വാങ്ങി മൂന്ന് വർഷത്തിനുള്ളിൽ അവ വിറ്റാൽ, ആദായനികുതി സ്ലാബ് നിരക്കിൽ ഹ്രസ്വകാല മൂലധന നികുതി നൽകണം. മൂന്നു വർഷത്തിനു ശേഷമാണ് വിൽപ്പനയെങ്കിൽ ദീർഘകാല മൂലധന നേട്ട നികുതിയാണ് ബാധകമാകുക.